Ագռավն ու աղվեսը


Բախտի բերմամբ,
Թե պատահմամբ,
Մի մեծ ագռավ
Մի գունդ պանիր
Դաշտում գտավ,
Կտուցն առավ,
Ծառին թռավ։
Օ՜, ի՜նչ պանիր, դեղին ոսկի…
Բայց դեռ չառած համը իսկի,
Աղվեսն անցավ ծառի մոտով,
Գերվեց, էրվեց պանրի հոտով։
Վազեց գնաց բերնի ջուրը,
Եվ թուլացան կուռն ու ճուռը,
Էն ժամանակ իրա ձևին,
Ծառի տակից, աչքն ագռավին,
Հեզիկ, նազիկ, Փափկամազիկ,
Բացեց լեզուն անո՜ւշ, մեղո՜ւշ։
Թափե՜ց, չափե՜ց շաքար ու նուշ։
Ես քո գերին
Քո էդ սևիկ
Վառ աչքերին,
Նուրբ ծալքերով
Զույգ թևերին։
Մի դու մտիկ,
Էդպես քթիկ,
Էդպես ճտիկ,
Մախմուր ագին,
Խաս ու ղումաշ,
Ատլասն հագին։
Գիտե՜մ, անշուշտ, իմ քուրիկի
Ձայնն էլ կըլի հրեշտակի։
Երգի, քուրիկ, մի ամաչի,
Իմ ուզածը մի մեծ բան չի։
Թե որ չքնաղ էդ տեսքիդ հետ
Երգելում էլ եղար վարպետ,
Օ՜, կդառնաս, իմ մաքրուհի,
Թռչունների մայր թագուհի։
Ագռավ ազին իրեն տված
Գովեստներից շշմած, ուռած՝
Ագռավային
Բկովը մին
Որ չկռռա՜ց,
Պանիրն ընկավ ծառիցը ցած,
Շողոքորթը ըռխեց, գնաց։

Реклама

ԱՆՏԵՐԵՎ ԾԱՌ


Փչեց ցուրտ քամին,
Եկավ մեգ, մշուշ.
Թերթերը թափեց
Ծաղիկը քնքուշ:

Անտերև ծառը
Ճյուղերը ճոճեց.
Աշնան քամու հետ
Կանգնեց ու վիճեց.

— Հե՞ր տերևներս
Մեկ-մեկ պոկեցիր
Ու աչքիս առաջ
Գետին ածեցիր:

Խնկոյանական օրեր


Ժամկետ` Հոկտեմբեր ամիս

Մասնակիցներ` 1-ին դասարանի սովորողներ
Նպատակը՝  Խնկոյանի ստեղծագործությունների միջոցով  առաջին դասարանի սովորողների ուսումնական գործունեության կազմակերպում:

Ընդհանուր խնդիրները՝

  • բանավոր խոսքի զարգացում
  • մաթեմատիկական հասկացությունների ձևավորում
  • մեդիատեխնոլոգիական հմտությունների ձևավորում
  • տեխնոլոգիական հմտությունների զարգացում
  • Բնության երևույթների մասին գիտելիքների համալրում
  • Բնական, կենսական միջավայրի ուսումնասիրում
  • Դիտումներ, դիտարկումներ կատարելու հմտությունների ձևավորում:

Նախատեսված ստեղծագործությունների ցանկ՝

«Աքաղաղն ու կտուրը», «Մեղու», «Բզեզ» , «Գիշեր» , «Ծիածան», «Չորս եղանակ»,«Փեսացու մուկիկը»:

Լեզվագործունեություն՝ Բառը հնչյունների բաժանելու կարողության ձևավորում, միևնույն հնչյունը բառի մեջ տարբեր դիրքերում գործածելու հմտության զարգացում, ստեղծագործական երևակայության զարգացում:

Մաթեմատիկական գործունեություն՝ ծանոթացում թվանշանների հետ, մինչև տասը թվերի անվանումները և գրառումը, պարզ խնդիրների լուծում:

Մեդիատեխնոլոգիա՝ Paint նկարչական ծրագիր, Word, Smartnotebook ծրագրերի գործիքների կիրառում:

Տեխնոլոգիա՝ Գույների արթնացում /հիմնական և բաղադրյալ գույներ/, ծեփում, ապլիկացիա:

Նախագծի արդյունքը կներկայացվի տեսանյութերի, ձայնագրությունների, էլեկտրոնային դասերի, ֆոտոշարքերի տեսքով:

Արդյունք.

Արև, Լուսին, Աստղեր


Արև

Ամեն օր Արևը դուրս է գալիս, ու լույսը բացվում է, իսկ երբ մայր է մտնում, օրը մթնում է: Իրականում մեր երկրագունդը պտտվում է Արևի շուրջը, և Արեգակն է լուսավորում Երկիրը: Արևը նաև տաքություն է տալիս մեզ: Այն շիկացած գունդ է, նրա վրա ամեն ինչ հալված եռում է: Եթե Արեգակը չլինի, Երկրի վրա ամեն ինչ կսառչի: Ե՛վ բույսերը, և՛ կենդանիները, և՛ մարդիկ չեն կարողանա ապրել առանց լույսի ու ջերմության, ինչպես և` առանց օդի:
Ուրեմն առանց Արևի Երկրի վրա չի կարող կյանք լինել:
Երբ մեզ մոտ մութ է, Արեգակը երկրագնդի հակառակ կողմն է լուսավորում: Բայց այդ ժամանակ իր լույսը տալիս է Լուսնին, Լուսինն էլ փոխանցում (անդրադարձնում) է մեզ, և գիշերը սարսափելի խավար չի լինում:

Լուսին
Երկնքում Արևն ու Լուսինը նույն մեծության են թվում:Բայց չէ՞ որ ամեն ինչ հեռավորությունից է կախված (հեռվում սավառնող մեծ ինքնաթիռը մեզ ավելի փոքրիկ է թվում, քան մեր կողքին նստած թռչնակը):
Արևը մեզանից շատ ավելի հեռու է, քան Լուսինը: Դրա փոխարեն այն ավելի մեծ է Լուսնից:
Լուսնի մակերևույթը տխուր տեսք ունի: Այն շատ մուգ գույնի է և ծածկված է մեծ ու փոքր փոսերով: Լուսնի վրա նաև լեռներ կան: Փոսերը մեզ երևում են մուգ կետերի տեսքով: Լեռներն էլ սրագագաթ չեն, մի տեսակ կլոր տեսք ունեն:Լուսնի վրա ո՛չ օդ կա, ո՛չ ջուր: Պարզ է , որ այնտեղ կյանք չի կարող լինել:Լուսինն իր լույսը չունի. այն ընդամենը փոխանցում, անդրադարձնում է Արևի` իր վրա ընկած լույսը:
սավառնել-թռչել

Աստղեր
Երբ Արևը մայր է մտնում, երկինքը մթնում է, և այնտեղ հայտնվում են աստղերը: Դրանք անթիվ-անհամար են: Այնքան շատ, որ ինչքան էլ ուզենանք, չենք կարողանա հաշվել: Դա միայն գիտնականները կարող են անել: Բայց գիտե՞ք, որ իրականում աստղերն էլ Արևի նման մեծ են, Արևի նման պայծառ ու տաք: Այսինքն` նրանք բոլորն էլ հրեղեն վիթխարի գնդեր են, ինչպես Արևը: Իսկ մեզ մոտիկ, սեղանին դրված մոմի լույսն ավելի պայծառ է երևում, քան հեռվում գտնվող մեքենայի կամ խարույկի պայծառ լույսը:
Այդ է պատճառը, որ աստղերը մութ երկնքում ընդամենը թույլ լույս արձակող կետեր են թվում:
վիթխարի — շատ մեծ, հսկա

Ծիտն ու բազեն


Ծիտը ծառին ծլվըլում է.
— Ծի՜վ, ծի՜վ, ծի՜վ.
Բազեն գլխին պտըտվում է.
— Վու՜յ, վու՜յ, վու՜յ…
Ծիտը լռեց, ծիտը վախեց.
— Վա՜յ, վա՜յ, վա՜յ…
Բազե, թը՜ռռ, բազե թը՜ռռ.
— Հա՜յ, հա՜յ, հա՜յ…
Բազեն թռավ,
Բազեն փախավ,
Ի՜նչ լավ էլավ.
— Հե՛յ – հեյ՛ – հե՛յ…
Ծիտի՛կ միտիկ, պի՛ծիկ միծիկ,
Պըտպըտուրի՛կ, չըլպըտուրիկ,
Դու լա՛վ պրծար չար բազեի
Սուր ճանկերից, հա՜ – հա՜ – հա՜…

Բարձունքի հաղթահարում․ Ապարան, Լուսագյուղ, Թուխ Մանուկ եկեղեցի


Ուսումնա-հայրենագիտական ճամփորդության խումբը` Արևմտյան դպրոցի 1-ին դասարանի սովորողներ և ծնողներ

Հաղթահարվող բարձունքը՝ Լուսագյուղ, Թուխ Մանուկ եկեղեցի

Ըստ կրթահամալիրի ուսումնական օրացույցի «Բարձունքի հաղթահարում» ուսումնական նախագիծն իրականացվում է տարվա մեջ երկու անգամ՝ սեպտեմբերի 19-26-ը՝ «Անկախության տոն. Բարձունքի հաղթահարում» և մայիսի 28-29-ը ՝  «Հանրապետության օրեր. Բարձունքի նվաճում» նախագծերով:
Նպատակը՝

Ճամփորդելու միջոցով ճանաչել շրջակա միջավայրը, իր գործունեությամբ նպաստել շրջակա միջավայրի պահպանմանն ու բարելավմանը:

Խնդիրները`

• Գործունեությանը նախապատրաստվելու կարողության ձևավորում:
• Թիմային (խմբով) աշխատելու (հանդես գալու) կարողությունների ձևավորում:
• Ընտանիքին ներգրավելով ուսումնական գործընթացին՝ դարձնել դրա մասնակիցը:
• Ճամփորդական, արշավային կանոնների յուրացում ու իրագործում:

Սովորողների նախնական կարողություններ և հմտություններ

• Կարողանա կազմել ճամփորդության համար անհրաժեշտ պարագաների ցանկը (խմբով)
• Ճամփորդության համար կանոններ մշակել
• Թվային ֆոտոխցիկով, հեռախոսով լուսանկարել
• Ճամփորդության մասին մի քանի նախադասությամբ պատմել (դասարանում, տանը), տեսածը նկարել, ծեփել

Ճամփորդության ընթացքում հաղթահարելով նախատեսված բարձունքը՝ ծածանել եռագույնն ու կրթահամալիրի դրոշը:
Ճամփորդության ընթացքն ամփոփվում է ճամփորդության մասին պատումներով, ֆոտոպատումներով, տեսաֆիլմերով, որտեղ արտացոլված կլինեն հավաքագրված տեղեկությունները:

Մեկնում՝ Արևմտյան դպրոցից,  20.09.2018, 09:30-ին

Վերադարձ՝ 15:00

Երթուղին՝ Երևան- Լուսագյուղ․ Թուխ Մանուկ 28,7 կմ, 33րոպե

  1. Առաջին կանգառը Լուսագյուղ
  2. Ընդմիջում
  3. Քայլքով հաղթահարում ենք բարձունքը /ընթացքում էկո աշխատանք/
  4. Վանքի և շրջակա տարածքի ուսումնասիրություն
  5. Երաժշտական դադար- համերգ վանքի բակում. Կոմիտաս. «Հա՛յր մեր», «Կաքավիկ», «Արև, արև»
  6. Քայլքով իջնում ենք բարձունքը
  7. Ընդմիջում, ազգային խաղեր
  8. Վերադարձ

Նախագծի ընթացքը՝ Մինչև բարձունքի հաղթահարումը, սովորողներն ծանոթացնում ենք ճամփորդության կանոններին, պատմում Թուխ Մանուկ եկեղեցու մասին։

Խնդիրները՝

  • տեղեկություններ ստանալ վայրի մասին (դիտել տեսանյութ),
  • դիտել քարտեզի վրա նշված ճանապարհը, ինչ վայրերով ենք անցնելու, որքա՞ն հեռավորություն են հաղթահարելու, որքա՞ն ժամանակում
  • ճամփորդական պայուսակում անհրաժեշտ իրերի առկայությունը.
  • խմբով ճամփորդելիս, ընկերական պատասխանատվության նշանակության կարևորությունը
  • իմանալ առաջին օգնության տարրական կանոններ
  • ուսումնասիրել միջավայրը
  • էկո աշխատանքի իրականացում.
  • լուսանկարել բնության տեսարաններ, շինություններ, մարդկանց
  • պատմել օրվա մասին՝ պահպանելով գործողությունների հաջորդականությունը

Ճափորդության մասնակցին անհրաժեշտ իրեր՝

  • հարմար ուսապարկ, հագուստ (անպայման տաք հագուստ)
  • արևապաշտպան քսուկ, գլխարկ
  • խաղեր՝ գնդակ, պարան
  • Անհատական թվային միջոցներ՝ ֆոտոխցիկ
  • Օրապահիկ

Կարևոր պայման

Արշավական-ճամբարականը
չի ուշանում
չի տրտնջում
չի հոգնում
չի խուսափում դժվարություններից
օգնում է ընկերոջը
մաքուր է պահում շրջապատը
ակտիվ է, նախաձեռնող ու կարգապահ
լուսաբանում է, պատմում, ներկայացնում
իր հետ չի բերում գազավորված ըմպելիք, չիփսեր